جيلنا الجيل المحظوظ

كتب : أحمد حسين

جيلنا الجيل المحظوظ

جيلنا من صغره و هو عدى عليه حاجات بالتدريج محصلتش لا للجيل اللي قبلنا و اللي بعدنا شافوها عالجاهز .. احنا اللي شوفنا الطبخه و هي بتتعمل و بتتطور .. شوفنا التليفزيون الابيض و اسود اللي كنت علشان تقلب القنوات عند جدك لازم تروح لحد التليفزيون و تدوس هناك و بعدين ظهر التليفزيون الملون اللي كان زي الصندوق الخشب و زرايره معدن فاكره ؟

و بعدين ظهر الريموت للتليفزيون .. و بعدين هوووووب ظهر الدش و كان ظاهرة كله جري عليها .. و كلمة ياااااه كل دي قنوات .. و انت بتنتهز اي فرصه علشان تشوف كل ما لذ وطاب من القنوات و البرامج .. و قبلها كان جهازالفيديو اللي كان بيركب عليه شرايط الأفلام و المسرحيات ( حنفي الأبهه و العيال كبرت و شمس الزناتي و 007 وغيرهم )

و تنزل السوق بعدها بشوية تلاقي كمبيوتر صخر  اللي كان عليه برنامج الرسم و ازاي تطلع تاريخ ميلادك الهجري من الميلادي . كانت اول مره نشوف الكيبورد انبهار ما بعده انبهار ..

و في نفس التوقيت الي نزلت فيه لعبة tetris على جهاز صغير كده في ايدك و بتحاول تكسر الرقم القياسي .. نزلت الاتاري .. اللي كان معاها شرايط بتركب و دراع بزرار احمر وحيد .. و كان اللعب عليه متعه مع المزيكا البدائية اللي كانت مصاحبة الألعاب .

كبرنا شوية و الأتاري اتطورت لنينتندو و لعبنا ماريو و كابتن ماجد و رامبو .. و المتعه كبرت و حب التكنولوجيا اتطور جوانا واحنا بنشوف تطور الكاسيت من باب واحد لبابين .

و جه وقت السيجا .. اللي جننت الناس ساعتها من الواقعية في لعبة زي المصارعه .. و شهرة لعبة سونيك اللي هي نزله فيلم السنه الجايه ، و اتحول الكاسيت ل ووكمان و كانت قمة الاناقة ساعتها و الووكمان بقه CD man تقريبا في سنة ١٩٩٩ ابتدى يظهر الكمبيوتر بشكله التجاري الرخيص شوية بعيدً عن شكله اللي كان غالي و كان في المدارس فقط .

سنة ٢٠٠٠ بقه في حاجة اسمها ألكاتيل و نوكيا و اريكسون و سوني .. عملو موبايلات تشتغل على شبكات المحمول الجديدة كليك و موبينيل .. و شوفنا الموبايلات دي و هي بتطور كل شوية و بينزل منها الجديد كل كام شهر ، لحد ما نوكيا سيطرت على كل حاجه

و ال CD بقه DVD … و السي دي روم .. بقه يقرا و يكتب .. و ظهر بعدها ال mp3 .. فلاشة ميموري بسماعات بيتحمل عليها اغاني .. و الموبايلات بقت بزراير كتير .. زي بلاك بيري .

و هوووووووب نزل الايفون اللي كله شاشة و مفيش زراير .. و اتسحبت السجادة من تحت نوكيا .. و بعد التريقه على الجهاز بقه كله بيجري وراها .. و اختفى ال CD … و ال DVD … و ال mp3 . كام شركة قامت على صناعات بعدين التطور ده قتلها .

شوفنا شركات ظهرت و شركات ماتت و صناعات بقت اقوى و صناعات بقت سراب و مالهاش تلاتين لازمة 

احنا جيل حضر الثورة التكنولوجية و الصناعية من اولها علشان كده ما بنقلقش من التطور و مش زي الجيل اللي قبلنا بيقول التكنولوجيا واخدانا على فين ؟ المهم تستفيد من التطور اللي بين ايديك و بدل ما كنت بتاخد وقت كبير علشان توصل للمعلومة دلوقتي المعلومة بين ايديك . ع الأقل موبايلك دلوقتي هو مكتب متنقل . و خسارة إن ناس كتير مختصرة التكنولوجيا و المعلومات انها الفيس بوك بس . في كنز بين ايديك مكانش متوفر لناس قبلك تعبوا في الوصول لأي معلومه ترشدهم للنجاح

احنا جيل محظوظ